നിരഞ്ജൻ

കുഴഞ്ഞ പൊറോട്ടകൾപോലടുക്കിയ
ഫയലുകൂമ്പാരത്തിനിപ്പുറത്തൊറ്റയ്ക്ക്

തണുത്ത പഴം പൊരി പോലെയാപ്പീസിന്റെ
ചില്ലുകൂട്ടിൽ ബാക്കിയായ് പോയൊരാൾ

കണ്ടാലറിയാം..പഴമനസ്സാണ്..
ഇത്തിരി പഴയവിചാരങ്ങളാണ്
പഴയ മലയപ്പുലയന്റെ തോളിനോടൊപ്പം
കുനിഞ്ഞുശീലിച്ചതാണൊക്കെയും..

ആറ്റുനേന്ത്രക്കിനാവുകൾ വിങ്ങും
മനസ്സിൽ മധുരം കിനിഞ്ഞുനില്പുണ്ട്
പുറമേപൊതിഞ്ഞ മേദസ്സിന്റെ
കൊളസ്ട്രോൾ കിനിച്ചിലുണ്ടെങ്കിലും
പഴമനസ്സാണ്..പഴയവിചാരങ്ങളാണ്..

അല്ലെങ്കിലെന്തിനഞ്ചരയ്ക്കപ്പുറം
വിറങ്ങലിച്ചാപ്പീസിലൊറ്റയ്ക്കിരിപ്പൂ..!