എസ്.കണ്ണന്‍

ഇരുമ്പിന്റെ തുരങ്കത്തിലിരുന്നു അലക്സാണ്ട്ര അവന്റെയടുത്ത് പോകുവാനതിര്‍ത്തിയില്‍ സൈനികരിടയ്ക്കുവന്നുറങ്ങുന്ന താവളത്തില്‍ ചാരും ചുമരുകളുരുക്കാണ് അവ നീങ്ങും ചക്രവും പാളങ്ങളും ഭൂമിക്കു കുറുകെ പോകും ശബ്ദവുമുരുക്കാണ് ചുറ്റിലുമിരിക്കുന്ന പുരുഷനോരോരുത്തനെയും ചുറ്റുന്ന പരുത്തിയേതു മണ്ണില്‍ നിന്നെന്നവളോര്‍ത്തു. പരുത്തിപഞ്ഞിക്കേകും നാരുകളിഴചേര്‍ത്തു. പിണഞ്ഞു കൊരുത്തോരോ കവചം മറയ്ക്കുന്ന സൌമ്യ യുദ്ധോപകരണങ്ങള്‍ക്കിടെ എകരംകവച്ച ചെറുപ്പക്കാര്‍ക്കിടെ ഒരു വശത്ത് ഇരുന്നു അവള്‍. വമിക്കും കണ്ണില്‍ മുന്നില്‍ കുഴിഞ്ഞ തോക്കിന്‍ മുന്നില്‍ കമഴ്ന്ന ഹെല്‍മറ്റിന്‍ ഛായ വീണ പുരികങ്ങള്‍ക്ക് മുന്നില്‍ അവള്‍ മുഖം തിരിച്ചതുചെന്നു വീണതു തുരുമ്പില്‍ ഇളകിപോയയാണിയുരുളും പ്രതലത്തില്‍ നീണ്ട ചെയ്നിന്‍ കശേരുക്കളീര്‍പ്പത്താലെ തിണര്‍ത്തയിഴച്ചിലില്‍ ഒറ്റയുടുപ്പില്‍ പതുക്കെനിന്ന് ശ്വാസമെടുത്താണവളാപ്പൊങ്ങിയ- പടികേറിയെത്തിയതകത്തേക്ക് അമ്മയായിരുന്നതിന്‍ മുമ്പേ പെണ്ണായിരുന്നവളിപ്പോള്‍ അമ്മമാര്‍ക്കൊക്കെയുമമ്മ തെല്ലുവിളര്‍ത്തതെങ്കിലുമാമുടി തോളും പുറവും കടക്കുന്നു.

ഈ ആയുസ്സിന്‍ സ്വന്തരക്തത്തിന്റെ തുഞ്ചത്തെ- യവസാന പുരുഷനെക്കാണാനവള്‍ പോകുന്നത് പുരുഷന്മാര്‍ ശ്വസിക്കുന്ന പുരുഷന്മാര്‍ ചുറ്റിലും അലഞ്ഞു ചിതറിപ്പോയോരവരെ അവളോര്‍ത്തു ഈ രണ്ടു കൈപ്പത്തിയില്‍ മലര്‍ന്നവര്‍ കഴുത്തില്‍ മുഖം ചേര്‍ത്ത് നിന്നവര്‍ അകലെപ്പോയി ചിലര്‍ മറഞ്ഞു പോയി കണ്ണിലേക്കിറുകിച്ചേര്‍ന്ന പുരികങ്ങള്‍ കൈക്കുള്ളിലാകുമ്പോഴും ദൂരെയെങ്ങോ തപ്പിത്തിരഞ്ഞു നടക്കുന്നവര്‍ തോണിയും തുഴയും പോലെ മലര്‍ന്നയുടലുകള്‍ കരയില്‍ നോകി നില്‍ക്കെ അഴിഞ്ഞു നീങ്ങിപ്പോയി പരപ്പുപിളര്‍ന്നു ചെന്നാകാശമിറങ്ങുന്ന ദിശയ്ക്കു പാഞ്ഞു ലോഹം ഒച്ചചെന്നലയ്ക്കുന്ന മൈതാനം കടക്കുന്നു മരക്കൂട്ടത്തില്‍ കലമ്പുന്നു. അവള്‍ക്കിപ്പോഴേ കാണാമാവനുറങ്ങുന്ന- മുറിയിലലാറമായുണര്‍ന്നിരിക്കുന്ന രാത്രി അവന്റെ ദേഹമാണാമുറിയിലെ ചന്ദ്രന്‍ അതില്‍ സൂര്യന്‍ പകല്‍ വരച്ച പാടുകള്‍- നോക്കുമിരുകണ്ണുകള്‍കള്‍ കാണാം മടിയിലിരിക്കുന്ന സ്വന്തം കൈതണ്ടയിലവള്‍ നോക്കി അതിനുചേര്‍ന്നിരിക്കുന്ന തോക്ക് തോളിന്നൊപ്പമുയര്‍ത്തി ജനലിനപ്പുറം പാളും പകലിനെച്ചൂണ്ടി ഉന്നം നോകി .

റഷ്യന്‍ സംവിധായകനായ അലക്സാണ്ടര്‍ സോകുറോവിന്റെ ചിത്രമാണിത്.അദ്ദേഹത്തിന്റെ തന്നെ ഫാദര്‍ ആന്‍ഡ്‌ സണ്‍ ,മദര്‍ ആന്‍ഡ്‌ സണ്‍ എന്നീ ചിത്രങ്ങളുടെ തുടര്‍ച്ച യാണ് അലക്സാണ്ട്ര .