അജീഷ് ദാസന്‍

എവിടെ നിന്നോക്കെയോ
വണ്ടിയില്‍ വന്നിറങ്ങിയ കുട്ടികള്‍
ഈ പുഴയുടെ തീരത്ത് നിന്ന്
കാടിനെ നോക്കി എന്തൊക്കെയോ വിളിക്കുന്നു.
കുട്ടികളെ നോക്കി
കാടും എന്തൊക്കെയോ വിളിക്കുന്നു

കുട്ടികള്‍ ഉച്ചത്തില്‍ വിളിച്ച് കൂവുന്നത്
അവരുടെ പേരുകള്‍ തന്നെയാണെന്ന്
കാടിനറിയില്ലല്ലോ?

കാട് ഇങ്ങിനെ വിചാരിച്ചു
"ശ്ശെടാ" ഈ പിള്ളേരോട്
ഒരു ദ്രോഹവും ഞങ്ങള്‍ ചെയ്തിട്ടില്ല
പിള്ളേരുടെ തന്തമാരോടും
തന്തമാരുടെ തന്തമാരുടെ തന്തമാരോടും
ഞങ്ങള്‍ ദ്രോഹമെന്നും ചെയ്തിട്ടില്ല
പിന്നെന്തിനാ ഇവറ്റകള്‍
ഇത്രയും ദൂരം വണ്ടി പിടിച്ച് വന്ന്
ഞങ്ങളെ നോക്കി തന്തയ്ക്ക് വിളിക്കുന്നത്