നസീര്‍ കടിക്കാട്

ട്യൂഷനു പോയ മകനെക്കാത്ത്
റോഡരുകില്‍ നില്‍ക്കുമ്പോള്‍
ഓടിപ്പൊകുന്ന വണ്ടികളുടെ പേര്
കാണാപ്പാഠം

ടൊയോട്ട
മെര്‍സിഡിസ്
ലംബോര്‍ഗിനി
ഭാഷ അനായാസമാകും

ഓരോ വണ്ടിനമ്പറും
കൂട്ടിക്കിഴിച്ച്
കണക്കാവും

അകലേന്നകലേക്കോടുന്ന
ലോറി
പിന്നിലേക്കടുക്കുമ്പോള്‍
ഫിസിക്സ്
മുമ്പില്‍ ബ്രേക്കിടും

കെമിസ്ട്രിയിലാണു ട്യൂഷന്‍

വണ്ടിയോടിക്കുമ്പോള്‍
ഉറക്കം തൂങ്ങുന്ന കണ്ണില്‍
നാരങ്ങത്തൊലി തെറുപ്പിച്ച്
ട്രാക്കുതെറ്റി
മരത്തിലിടിച്ചു മരിച്ചവരുടെ
ബയോളജി എളുപ്പം

ഹിന്ദിയില്‍ തോല്‍ക്കുമെന്നുറപ്പ്

തലയ്ക്കുമുകളില്‍ എത്ര വരവരച്ചിട്ടും
മുറിച്ചുകടക്കുമ്പോള്‍
പത്രക്കാരന്റെ സൈക്കിളിടിച്ചു മരിക്കുന്ന
സ്വപ്നം തന്നെ
വീണ്ടും കാണും

കെമിസ്ട്രി ട്യൂഷന്‍ കഴിഞ്ഞ്
റോഡു മുറിച്ച്
മകന്‍ വരുവോളം
ഞാനിങ്ങനെ
ലോകകാര്യങ്ങള്‍ പറഞ്ഞുകൊണ്ടിരിക്കും