പുതുവത്സരാശംസകള്‍

വാസുദേവന്‍ കോറോം

ജോസഫേട്ടന്‍


വര:സുധി ഇരിട്ടി

ഭാഷയെ പഠിക്കുന്നതിനു മുമ്പ്‌
ജോസഫേട്ടന്‍
ഒരച്ചുകൂടമായിരുന്നു എന്നുതോന്നും
സംസാരം കേട്ടാല്‍

വള്ളി പുള്ളി അകാരം ഇകാരം
ഉകാരം ചില്ല്‌ എല്ലാം
മെല്ലെ പെറുക്കിവെച്ച്‌ പറയുമായിരുന്നു

കേള്‍ക്കുന്നോരുടെ ചെവിയില്‍
അച്ചടിമഷി തെളിഞ്ഞുപതിയും

ഇന്നലെ പോയപ്പോള്‍ കണ്ടു
നിശ്ശബ്ദമായ അതേ അച്ചുകൂടം

അച്ചടിക്കാന്‍ പറ്റിയിട്ടില്ലാത്ത
ഞെരക്കം

വി.മുസഫര്‍ അഹമ്മദ്

തുഴച്ചില്‍


1

നാളെ എന്നെഴുതിയ
പുല്‍പ്പരപ്പില്‍ വേണം
ഇന്നു മേയാന്‍
ഫ്രീസര്‍ തട്ടില്‍
അണു ബാധയേല്‍ക്കാതെ
വെക്കും മുമ്പ്
പുള്ളിപ്പശു
എഴുതിയതാണീ വരികള്‍.
മലവെള്ളപ്പാച്ചിലില്‍
ഒന്നിച്ചൊഴുകുമ്പോള്‍
ഇടയന്‍ ആട്ടിന്‍ കൂട്ടത്തോട്
കണ്ണീരണിഞ്ഞ് പറഞ്ഞു
ഇന്നലെ കറന്നപാല്‍ വേണം
മിനിയാന്ന് കുടിക്കാന്‍.

2

കാറ്റും വെള്ളവും
കെട്ടിടങ്ങളെ
ചുരുട്ടിക്കൂട്ടി.
കടലിടുക്കിലുറങ്ങിയ
എണ്ണക്കപ്പലുകള്‍ അലകും
തട്ടും വേറിട്ട്
കടലാസ് തോണികളായി.
മറ്റെന്നാള്‍
സൂര്യനാകുമായിരുന്ന
നക്ഷത്രം ഞെട്ടറ്റ് വീണ് മുങ്ങി.
പുല്‍ക്കൊടി അതിജീവിച്ചെങ്കില്‍
ഇന്നലെ,ഇന്നു,നാളെ എന്നിവര്‍
വീണ്ടും കാറ്റു കൊണ്ട്
മേഞ്ഞ് തുടങ്ങും.
ഇതെഴുതിക്കഴിഞ്ഞ്
പ്രളയപ്പരപ്പ് വടക്ക് നോക്കിയേന്തി
ഭൂമിയുടെ
കലണ്ടറിനായി
നീന്തിത്തുടങ്ങി.

എല്ലാ ബുലോക
വായനക്കാര്‍ക്കും
പുതുകവിതയുടെ
ക്രിസ്തുമസ്
ആശംസകള്‍.....

എം.ആര്‍.വിബിന്‍

രണ്ട് കവിതകള്‍


നെരുദ

ക്ഷമിക്കണം..
ഇവിടെ വസന്തമില്ല.
ചെറി മരങ്ങളും.

ഒരു മാവെങ്കിലും
കിട്ടിയിരുന്നെങ്കില്‍...

വയല്‍

നിന്റെ വീടിന്റെ
ഏത് കോണിലാണ്
ഞങ്ങളുടെ
കാല്പാടുകളുടെ
ഫോസില്‍?

വി.എച്ച്.നിഷാദ്

പ്രവാസി


പ്രവാസം കഴിഞ്ഞ്
തിരിച്ചെത്തിയ
മകന്‍ പറഞ്ഞു:
‘ഒരു കണ്ണാടി
തരാമോ അമ്മേ
എനിക്കെണ്ടെ
പഴയ മൊട്ടത്തലയില്‍
കൂടി തൊടണം.

ടി.പി.വിനോദ്

സോപാധികം


അഭ്യാസവും
പ്രകടനവും
കാണിയും
ഒന്നുതന്നെയായ
വേറെയൊരു സര്‍ക്കസ്
ഞാന്‍ തന്നെ
ആവിഷ്ക്കരിക്കുന്നതു വരെ,

എന്റെയൊരു ഒഴിവുകാലത്തെ
ലാക്കാക്കി അത്
എന്നില്‍ വന്ന് തമ്പടിക്കുന്നതുവരെ,

മോഹഭംഗമേ
നീ നിന്റെ
നിരാശാമേള തുടരുക.

എല്ലാ ബുലോക വായനക്കാര്‍ക്കും പുതുകവിതയുടെ ബലി പെരുന്നാള്‍ ആശംസകള്‍