വിജേഷ് എടക്കുന്നി

സുഹൃത്ത്‌

കണ്ടു മുട്ടേണ്ടിയിരുന്നില്ല
കൂടുകൂടേണ്ടിയിരുന്നില്ല.
കലപില സംസാരത്തില്‍
കലങ്ങി മറിയേണ്ടിയിരുന്നില്ല.

കള്ളും ,ഹാന്‍സും ,കഞ്ചാവും,
'കരുതലും ' വേണ്ടിയിരുന്നില്ല.

കൂടിത്തിരിയലിന്റെ സര്ഗോത്സവങ്ങളില്‍ നിന്ന്
കവിത കിനിഞ്ഞു പോകുമെന്ന് കരുതിയിരുന്നില്ല.

കറുത്തവന്‍ , കുറിയവന്‍ ,കുടവയറന്‍ ,കോങ്കണ്ണന്‍
അവന്‍ അവന്റെ കുറവുകളില്‍ വാചാലന്‍ .
കള്ളനെന്നു മാത്രം സ്വയം പറഞ്ഞില്ല.

കള്ളനായ്‌ തന്നെ തുടരുമ്പോഴും
പ്രിയ സുഹൃത്തേ,
ഇനി നീയെന്റെ കാഴ്ച്ചയുടെ ഉമ്മറപ്പടിയില്‍
വെയില്‍ വീണു പരന്ന
നിഴലായ്‌ പോലും വരരുതേ..!!